អ្នកដែលខ្លួនស្នេហ៍


ដូចគ្នាប៉ុន្តែចិត្តបែងចែក                                       

មនុស្សម្នាក់ដោយឡែកមិនច្រលំ

ទោះឆ្ងាយពីគេឬលាយឡំ                                    

ក៏ចិត្តបង្ខំចែកឱយដាច់។

ម្នាក់នេះហាក់សែនឱយរែងគិត                             

ទោះគេប្រព្រឹត្តមិនចាំបាច់

ក៏តែងយកមកគិតសុះសាច់                                         

តម្លៃឱយស្រេចសំរាប់គេ។

ថ្វីអ្នកដទៃធ្វើដូចគ្នា                                             

ចិត្តរឹងទាមទារងាកវៀចវេរ

ទ្រនិចបេះដូងចង្អុលរេ                                          

បាញ់ឆ្ពោះតែគេគ្រងពុំបាន។

ហេតុអ្វីម្នាក់នេះពិសេសម្ល៉េះ                                  

ពុំអាចរបេះឃ្លាតពីប្រាណ

ពេលក្បែរអារម្មសែនសុខសាន្ត                              

រឿងទុក្ខប៉ុន្មានហាក់រសាយ។

បើប៉ះគ្នាដោយអចេតនា                                       

អារម្មប្រាប់ថាចម្លែកកាយ

ហាក់អៀនខ្មាសក្បដចិត្តសប្បាយ                          

ចង់តែប្រាប់ប្រាយថាចង់ក្បែរ។

ឱយតែចួបគ្នាទោះមិនស្តី                                      

ត្រេកអរគ្មានអ្វីអាចបកប្រែ

គ្រាន់ភ្នែកទល់ភ្នែកក៏សុខដែរ                                

មិត្តភាពឬស្នេហគិតមិនយល់។

បើមិត្រម្តេចចិត្តសែនបែងចែក                               

គេម្នាក់ចម្លែកនាំអំពល់

រាល់ទង្វើគេអើពើជ្រល់                                         

ចិត្តគិតវិលវល់ពីចិត្តគេ។

សែនគិតរាល់អំពើទាំងឡាយ                               

ដែលគេចំណាយឥតទំនេ

មកលើខ្លួនតើស្នេហមែនទេ                                               

ចង់សួរចិត្តគេតែមិនហ៊ាន។

ពេលគេមិននៅហាក់បាត់អ្វី                                              

មិនឮសម្តីមាត់បំពាន

សាកសួរហេតុអ្វីអវត្តមាន                                     

ចិត្តសែនរុករានបើមិនដឹង។

បើឃើញគេនៅក្បែរអ្នកផ្សេង                                 

ជាអ្វីក៏រែងគិតជញ្ជឹង

កំហុសតូចក៏ប្រកាន់ខឹង                                       

បើខឹងកំហឹងមិនងាយថយ។

ទោះស្អប់គេហើយក៏នៅស្នេហ                               

នៅចងចាំតែអារម្មមួយ

ដែលមានតែគេទើបអាចជួយ                                

សុខឬទុក្ខព្រួយអារម្មស្នេហ។

Thur, 23:33, 16/02/2012-Fri, oo:36, 17/02/2012

អារម្មស្នេហ

អារម្មមិនឋិតក្នុងអារម្ម                                          

ពុំអាចរៀបចំគ្រងថួនថែ

រសាត់អណ្តែតវិលឡប់ឡែ                                               

ចិត្តឆ្ងល់ខ្លះដែរតែមិនយល់។

ទោះបីមិនយកចិត្តទុកដាក់                                               

អារម្មចងឆ្វាក់នាំអំពល់

កើតអារម្មមួយគ្មានឫសគល់                                 

ប្រឆាំងតទល់ចិត្តខ្លួនឯង។

ដឹងត្រឹមពេលមួយសែនចម្លែក                               

ចិត្តរេរាផ្អែកមាត់ចង់ថ្លែង

ចង់ឃើញជិតក្បែរកាយសម្តែង                              

អារម្មឯងៗមិនដឹងខ្លួន។

បើមានគេចោទចំអន់លេង                                    

តែងខំប្រឹងប្រែងស្តីសងផ្ទួន

ប្រកែកតែចិត្តលួចបំពួន                                       

តើគេស្នេហខ្លួនដែរឬទេ?។

ដល់គេទាក់ទងអ្នកដទៃ                                       

ឬអ្នកដទៃទាក់ទងគេ

ចិត្តកាយរសាប់រសល់ទ្វេ                                      

មិនអាចឱយផ្ទេរអ្នកផ្សេងឡើយ។

ពេលគ្មានអ្នកណាគេដណ្តើម                               

បានដៃសម្បើមធ្វើតោះតើយ

បណ្តែតបណ្តោយគ្មានគោលត្រើយ                                   

មានស្នេហទៅហើយមិនដឹងទៀត។

ពេលព្រាត់បាត់ម្នាក់ទោះហេតុអ្វី                            

ចិត្តគរលែងស្តីបាត់ធម្មជាតិ

ស្រងូតស្រងាត់វិបត្តិសៀត                                    

ឯកាបៀនបៀតកំសត់ប្រាណ។

តែងចាំចងនូវអនុស្សា                                          

ចង់នៅឯកាឆ្ងាយរំខាន

រំឭករាល់ទីជាប់ដើមដាន                                      

ត្រឹមញញឹមបានក្នុងអតីត។

ស្មារតីពញ្ញាក់ក៏អារម្ម                                          

នឹកឃើញក្រៀមក្រំផ្ទុយការពិត

ទឹកភ្នែកក៏ធ្លាក់ចេញពីចិត្ត                                     

ក្នុងបេះដូងដិតដាមដោយស្នេហ។

លុះគេត្រលប់កែវនេត្រា                                        

គ្រាន់ឃើញច្បាស់ថាគឺជាគេ

ក៏រំភើបចិត្តស្រឡាញ់ថេរ                                      

ទទួលមិនរេអារម្មស្នេហ៕

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s